ಸುಟ್ಟುಬಿಡು ಭಗವಂತ

ಸುಟ್ಟುಬಿಡು ಭಗವಂತ 

ಚಟ್ಟಕೇರುವ ಮುನ್ನ 

ಶೇಷರಹಿತವಾಗಿ 

ವಿಷಯಾಸಕ್ತಿಗಳನ್ನ 

ಬಿಡಿಸಿಬಿಡು ಭಗವಂತ 

ಅಡಿಗಡಿಗೆ ತೊಡರುವ 

ಭವಬಂಧದ ಲತೆಗಳ 

ಲವಲೇಶವಿರದಂತೆ 

ಕೊಟ್ಟುಬಿಡು ಭಗವಂತ 

ನೆಟ್ಟಗೆ ನಿನ್ನನರಿಯಲೆನಗೆ 

ಸೊಟ್ಟ ನಡಿಗೆಯ ತೊರೆದು 

ದಿಟ್ಟ ನಡಿಗೆಯ ದಾರಿ 

ಜನ್ಮದಂತ್ಯಕೆ ಬಂದು ನೀನೇ ನೆಲೆಸು 

ಹೃನ್ಮನಗಳಲಿ ನೀನೇ ಚಲಿಸು 

ನಾನೆಂಬುವ ಅಹಮನಳಿಸಿ 

'ನೀನೇ' ಎಂಬ ಭಾವವ ನಿಲಿಸು. 

ಚಟ್ಟಕೇರುವ ಮುನ್ನ ಓ ಭಗವಂತ, ಚಟ್ಟಕೇರುವ ಮುನ್ನ................