ಆ ಭಾವ 

( ಇಂದು ಅಭಾವ) 

ಅಂದೆಂದೋ ಕಂಡಿದ್ದೆ 

ನೀ ಎನ್ನ ಮೊದಲಬಾರಿಗೆ 

ಇಂದು ಕೂಡ ಆ ಭಾವ 

ಜೀವಂತ ನನ್ನ ಮನದೊಳಗೆ 

ಇಂದೂ ಸಹ ಮೂಡುವುದು 

ಕಿರುನಗೆ ನನ್ನದರಗಳಲ್ಲಿ 

ದೂರದಿಂದ  ನೀ ನಕ್ಕಾಗ 

ಅಂದು ಕೆಲಕ್ಷಣ ಎನ್ನ ಕಂಡು 

ನಿನ್ನ ಮೊದಲ ಸ್ಪರ್ಶ 

ನನ್ನಲ್ಲಿ ನೆನೆಪಾದಾಗ 

ಇಂದೂ ಸಹ ಬಡಿಯುವುದು 

ವೇಗದಿ ಎನ್ನ ಹೃದಯ 

ನೀನಿಂದು ಸನಿಹದಲಿ 

ಇಲ್ಲದಿದ್ದರೆ ಏನಾಯ್ತು 

ಇನ್ನೂ ಸಹ ಜೀವಂತ 

ನಿನ್ನ ಭಾವವೆನ್ನ ಹೃದಯದಲಿ.   

 ರವಿ ತಿರುಮಲೈ 

ನಲ್ಲೆ

ಪ್ರೇಮ   ಸಮಾನತೆ  

ನಲ್ಲೆ ನಿನಗೆ ಚಂದಿರನೊಲು 

ವದನವನು ಇತ್ತವನು

ಮನದಲೆನ್ನೊಳು ಪ್ರಣಯ 

ಭಾವವನು ಬಿತ್ತಿಹನು                 "ನಲ್ಲೆ ನಿನಗೆ  ಚಂದಿರನೊಲು  " 

ನಲ್ಲೆ   ಕೋಗಿಲೆಯೊಲು 

ಕಂಠ ನಿನಗಿತ್ತವನು   

ಕೇಳಿ ಆನಂದಿಸುವ 

ಮನಸೆನಗೆ ಇತ್ತಿಹನು                     "ನಲ್ಲೆ ನಿನಗೆ  ಚಂದಿರನೊಲು  " 

ನಲ್ಲೆ ನಿನಗೆ  ಲಾವಣ್ಯ 

ರೂಪವನು  ಕೊಟ್ಟವನು 

ಅದನಾರಾಧಿಸುವ 

ಹೃದಯವೆನಗಿತ್ತಿಹನು                       "ನಲ್ಲೆ ನಿನಗೆ  ಚಂದಿರನೊಲು  "    

ಎನಗು ನಿನಗೂ ನಡುವಿನಲಿ 

ಅಂತರವನಿಟ್ಟವನು
ಅಂತರಂಗದಲಿ ನಿನ್ನ 

ನೆನವ ಮನವಿನಿತ್ತಿಹನು                       "ನಲ್ಲೆ ನಿನಗೆ  ಚಂದಿರನೊಲು  " 

ನಲ್ಲೆ ದೂರದೂರಿನಲಿ 

ನಿನ್ನನಿಂದು ಬಿಟ್ಟವನು 

ಮಿಲನೋತ್ಸವಕೆ  ಕಾಯ್ವ 

ತಾಳ್ಮೆಯನು ಕೊಟ್ಟಿಹನು                    "ನಲ್ಲೆ ನಿನಗೆ  ಚಂದಿರನೊಲು  " 

ರವಿ ತಿರುಮಲೈ 

                                                                                 

ಮತ್ತೆ ಬಂದಿದೆ ಸಂಜೆ 

ಮತ್ತೆ ಬಂದಿದೆ ಸಂಜೆ 
ಹೊತ್ತು ವಿರಹದ ನೋವ 
ಮರೆಯಬೇಕೆಂದರೂ 
ಮರೆಯಾಗದೀ ಭಾವ "ಮತ್ತೆ "

ಮತ್ತೆ ಆ ಮುಂಗುರುಳ
ಮಾತು ಮನದೊಳಗೆ
ಮತ್ತೆ ನಾ ಒಂಟಿ ಇಂದು
ಬರಡು ಬಾಳೊಳಗೆ
ನಡೆವ ಹಾದಿಯು ಇಂದು
ಸರಿದು ಹೋಗಿದೆಯಲ್ಲ
ಮತ್ತೆ ಪ್ರೇಮದ ರಾಗ
ಹಾಡಿ ಸೋತಿಹೆನಲ್ಲ "ಮತ್ತೆ "

ಮತ್ತೆ ನಿನ್ನ ನೋಡುವ
ತವಕ ಮನದೊಳಗೆ
ಉಳಿದೆರಡು ಮಾತುಗಳ
ನುಡಿವ ಬಯಕೆಯೊಳಗೆ
ಮನವು ವಿರಹದೊಳಿಂದು
ತೊಳಲಿ ಬಳಲಿದೆಯಲ್ಲ
ಸೇರುವಾಸೆಯ ಒರತೆ
ಬತ್ತಿ ಹೋಗಿದೆಯಲ್ಲ " ಮತ್ತೆ


ಎಲ್ಲಿಹೆಯೋ ನೀನಿಂದು
ನಾನಿನಿತು ಅರಿಯೆ
ತೊರೆದೆನ್ನ ಸರಿದದ್ದು
ಪ್ರೇಮದಲಿ ಸರಿಯೇ ?
ನಾ ನಿನ್ನ ಮನದೊಳಗೆ
ಇಲ್ಲವಾದರೆ ಏನು,
ನೀ ಎನ್ನ ಹೃದಯದಲಿ
ಇಹೆಯಲ್ಲ ಚಂದದಲಿ "ಮತ್ತೆ " 




http://www.youtube.com/watch?v=ygmCyDbEFok

ಪ್ರೇಯಸಿಗೊಂದು ಭಿನ್ನಹ


ದೂರ ನಿಂತು ಮಾತನಾಡದಿರು
ನೀ ಬಾ ಹತ್ತಿರಕೆ!
ಇಂದು ವಶದೊಳಿಲ್ಲ ಮನದ ಭಾವ
ನೀ ಬಾ ಹತ್ತಿರಕೆ!!

ಒಂದು ಯುಗದಿಂದ
ಆಸೆ ತುಂಬಿಹುದು
ನಿನ್ನ ಸೇರಲೂ,(೨)     
ಚಂದ್ರ ಚೆಲ್ಲಿಹ ಬೆಳಕು

ಇರುಳ ಬೆಳಗಿಹುದು

ನೀ ಬಾ ಹತ್ತಿರಕೆ !!! " ದೂರ ನಿಂತು "

ಮಂದ ಮಾರುತವಿಂದು
ಹೊತ್ತು ತಂದಿದೆ ಸಕಲ
ಸುಮಗಳಾ ಘಮಲಾ (೨)
ಕಳೆದುಹೋದರೆ ಇರುಳು
ಮತ್ತೆಂದು ಬರದು
ನೀ ಬಾ ಹತ್ತಿರಕೆ!!! "ದೂರ ನಿಂತು "

ಕಂಡ ಕನಸುಗಳೆಲ್ಲ
ನನಸಾಗುವ ಕಾಲ
ಸಂದಿದೇ ಇಂದು (೨)
ಒಂದಾಗುವ ಸಮಯ
ಬಂದು ನಿಂತಿದೆ ಇಂದು
ನೀ ಬಾ ಹತ್ತಿರಕೆ !!! "ದೂರ ನಿಂತು "

ರವಿ ತಿರುಮಲೈ

ಅರಿಯದಾ ಪ್ರೆಯಸಿಗೊಂದು ಪ್ರೇಮಕವಿತೆ

ಡವಡವಿಸುವ ಹೃದಯವಿದೆ
ಹಪಹಪಿಸುವ ಮನಸು ಇದೆ 
ಸೇರಬೇಕೆಂಬ ತವಕವಿದೆ 
ನಿನ್ನೂರಿಲ್ಲಿಗೆ ಬಹಳ ದೂರವಿದೆ 

ಪ್ರೇಮಲೋಕದ ಕನಸು ಕಾಣುತಿಹೆ 
ಕನಸಲಿ ನಾ ನಿನ್ನ ಸೇರುತಿಹೆ 
ನನಸಲೂ ನಾ ನಿನ್ನ ಬಯಸುತಿಹೆ 
ಏಕೆ ನಿನ್ನ ವದನವನು ತೋರದಿಹೆ 

ಒಮ್ಮೆ ಸಿಕ್ಕರೆ ನೀ, ಬಿಡೆನು ಎಂದೂ ನಾ 
ಮೈಮನಗಳಲಿ ನಿನ್ನ ತುಂಬಿಕೊಳ್ಳುವೆ ನಾ 
ಹೆಜ್ಜೆ ಹೆಜ್ಜೆಗೂ ನಿನ್ನ ಜೊತೆಗಿರುವೆನು ನಾ 
ಜನುಮ ಜನುಮಕ್ಕೂ ನಿನ್ನ ಜೊತೆಬಿಡೆನು ನಾ 

ನೀ ಯಾರೆಂದು ಅರಿಯದಿಹೆನು ನಾ 
ಸುಂದರಿ ನೀನಿರಬಹುದೆಂದು ಊಹಿಸಿಹೆನು ನಾ 
ಊಹೆ ಸುಳ್ಳಾದರೆ ಚಿಂತಿಸೆನು ನಾ 
ಒಂದು ಹೆಣ್ಣಾದರೆ ನೀನು ಸಾಕೆನುವೆನು ನಾ 


ಇದನ್ನು ಬರೆದದ್ದು ನಾನಲ್ಲ . .ನನ್ನ ಕೋತಿಯಂತಾ ಮನಸ್ಸು.